|
La banda da los sos primeros pasos nel branu del 2001 en Xixón (Asturies), anque nun ye hasta'l branu del añu siguiente cuando decide dar los sos primeros conciertos. Dende los sos empiezos apuesten pol amiestu ensin complexos de punk, hardcore, ska, reggae… con ritmos y melodíes del folklor astur, a los que sumen unes lletres de calter comprometíu y reivindicativu, non ensin grandes dosis d'ironía, pa que la xente páselo bien y cavilgue.
La so primer referencia sonora ye una maketa totalmente autoproducida, grabada n'ochobre de 2003 nel so propiu llocal d'ensayu, qu'entemez temes propios con dalguna versión. Mientres, esi añu percuerren bona parte del norte del Estáu presentando los sos temes.
A primeros de 2004 graben dos temes pal recopilatoriu de grupos asturianos "Rock'n'Llingua", col sellu L'Aguañaz. Unu d'estos temes ("Unidá") ye incluyíu nel recopilatorio "Punk de 2ª Generación" del sellu Santo Grial, que de la mesma, déxa-yos formar parte de la edición d'esi añu del festival Derramerock. D'esta actuación editaríase darréu'l tema "Gaiteru Rude-Boy" en directu, nel recopilatoriu "Festival Derrame Rock Al Rojo Vivo".
A finales del añu 2005 métense nos Estudios "Tutu" de Corvera pa grabar lo que va ser el so primer discu, "Semeya de la Rabia" de la mano de Sergio Rodríguez. Sicasí, esti trabayu nun va ver la lluz hasta l'añu siguiente, tres dellos retrasos y reaxustes na formación de la banda. Esti trabayu, autoeditáu pola mesma banda, tien una gran acoyida ente'l públicu, lo que los lleva a participar nuna bona cantidá de conciertos per tol Estáu. Mientres, esi mesmu añu graben un pequeñu homenaxe a tres bandes del llamáu RRV: Barricada, Parabellum y M.C.D, que ponen en descarga llibre al traviés de la so web.
Llegando la fin d'esi mesmu añu (2006), realicen la so primer xira europea, apadrinaos pela banda de punk-folk holandesa CIRCLE J.
Durante l'añu 2007, dellos temes de la banda son incluyíos en distintos recopilatorios a nivel estatal, ente los que hai de destacar "Ensín Cadenes", de l'asociación contra'l maltratu a les muyeres Xorrecer, y "DMR07", de la organización xuvenil nacionaliega Darréu.
Esi mesmu añu, graben un tema versionando a la veterana banda de rock-folk astur Dixebra, que va editase en 2008 nel discu que, sol nome de "Salú ya Dixebra… Perversiones", recueye 20 versiones de les principales bandes de rock, punk, hip-hop y folk d´Asturies.
La bona esperiencia de l'autoxestión aníma-yos a embarcase otra vegada na publicación de los nuevos temes de la banda, y asina, a finales de 2007, empiecen la grabación d'un nuevu llarga duración, que sol títulu de "Cantares pa dempués d'una Guerra" recueye la evolución de la banda nesa dómina. Pa esta grabación ponense en manos del productor Pablo Viña, y asina, ente finales de 2007 y principios de 2008 graben nos Parisana 33 Estudios de Cangues d'Onís, 11 temes nos que amás de los ritmos que son habituales na banda hasta'l momentu, atrévense con rancheres, rumbes ya inclusive pincelaes crust. Una gran variedá musical y unes perbones composiciones a les que nun fai xusticia la resultancia final de la grabación, sobremanera no qu'a soníu se refier. L'escelente diseñu del llibretu qu'acompaña'l CD ye realizáu pol gaiteru de la banda, Alfonso Zapico.
Una llarga xira de presentación y unos cuantos festivales por tol Estáu, ocupen el tiempu de la banda por esa dómina, al empar que van preparando nuevos temes.
Nel añu 2009 graben de manera del too casera, y producida por Fredo -unu de les guitarres de la banda-, una versión de "Llicenciáu Barricaes", de la mítica banda de rock-astur Avientu.
N'ochobre de 2010 empiecen la grabación del so tercer discu, "Mazcando Miseries". Otra vegada vuelven a los Estudios "Tutu" de Corvera, y otra vuelta de la mano de Sergio Rodríguez, graben 10 temes (más un intro y un outro) de rabiosu punk-folk, nos qu'incorporen nuevos instrumentos como´l curdión diatónicu y el bouzouki. Como nos sos anteriores trabayos, apuesten pola autoxestión, pero esta vegada coeditan el so trabayu coles productores asturianes Algamar Producciones y Xunca Records, intentando asina llograr un mayor espardimientu. El diseñu de la portada y del llibretu del discu, realizáu nuevamente pol so gaiteru, ye premiáu nos premios AMAS de la Música Asturiana 2011 como'l meyor diseñu d'un trabayu discográficu realizáu n'Asturies nel añu 2010.
A finales d'esi mesmu añu, y como presentación del so nuevu trabayu, embárquense nuna nueva xira europea, colos sos hermanos holandeses Circle J, y la banda alemana Raptus.
Tres unos meses de merecíu descansu a principios del 2011, faen la xira Miserable Tour pa presentar per tol Estáu'l so nuevu trabayu y celebrar los sos 10 años d'esistencia. Dan conciertos en tou tipu de sales y festivales qu'ocupen na actualidá'l tiempu de la banda.
Cabe destacar tamién les collaboraciones que realizaron con otros artistes durante estos años. Asina nos sos discos collaboraron xente d'Odio Visceral, Mala Reputación, La Tarrancha, Escuela De Odio, Slum, 40 Barrotes… Coles mesmes, miembros de SKONTRA collaboraron en diverses grabaciones con Circle J, Mala Reputación, Adizión Etílica, I.A.G…
A lo llargo d'estos diez años d'esistencia SKONTRA compartió tables con bandes internacionales y de too l'Estáu, ente les que s'atopen:
CIRCLE J, FLOGGING MOLLY, THE REAL McKENZIES, BANDA BASSOTTI, RAPTUS, THROW RAG, QUALITY EXPORT, I.A.G, ADIZIÓN ETÍLIKA, FALANONCADUCA, FACTOR77, BASTARDS ON PARADE, BRUTUS DAUGHTERS, TREZE, ODIO VISCERAL, MALA REPUTACIÓN, ESCUELA DE ODIO, DIXEBRA, LA COL.LA PROPINDE, LA TARRANCHA, SKAMA LA REDE, FELPEYU, KASKARRIAK, BOIKOT, PORRETAS, INEM KILERS, LENDAKARIS MUERTOS, KOMA, HABEAS CORPUS, SEGISMUNDO TOXICÓMANO, ENVIDIA KOTXINA, PUAGH, SIN DIOS… y un llarguísimo etc!!
|
|
|
|
|
|
Próximamente nuevas fechas
|
|
|
|
|
|
|
|
|
|
|
|
|
|
|
|
|
|
|
|
|
|
|
